দৃষ্টিহেৰুৱা পিতৃৰ সতে ন বছৰীয়া চুমনৰ কৰুণ কাহিনী

কঠিন বাস্তৱৰ  হাবুডুবু খোৱা কোমল মনৰ  জীৱন গাথা চুমনজ্যোতি গড়ৰ  ...কিশোৰ গৰাকীৰ চকুহালে পোৱা -নোপোৱা, আশা -নিৰাশা  তথা অবুজ বেদনাৰ  বহু কথাই...

কঠিন বাস্তৱৰ  হাবুডুবু খোৱা কোমল মনৰ  জীৱন গাথা চুমনজ্যোতি গড়ৰ 

...কিশোৰ গৰাকীৰ চকুহালে পোৱা -নোপোৱা, আশা -নিৰাশা  তথা অবুজ বেদনাৰ  বহু কথাই বুজায়,...

ৰমেশ চন্দ্ৰ চৰেণ

  দৰিদ্ৰতাৰ সৈতে যুজ দি  জীৱন সংগ্ৰাম কৰিবলগীয়া হোৱা এটি কিশোৰৰ এক কৰুণ বাস্তৱ৷ ঘৰ চলোৱাৰ বোজা বহন কৰিবলগা হোৱা এগৰাকী কনমানি কিশোৰ  ৷    কিশোৰমনৰ  উমলিজামলি ফুৰা  পখিলা খেদা বয়সত হাতত জোলোঙা এটি লৈ  ভিক্ষা কৰিবলগা হৈছে কিশোৰ গৰাকীয়ে ৷   ৯ বছৰীয়া কনমানিটোৱে  পেটৰ তাড়নাত দৃষ্টিহীন পিতৃৰ হাতত ধৰি    ভীক্ষা মাগি ফুৰিবলগা হৈছে ৷  ঘৰে ঘৰে  ভীক্ষা  মাগি  পোৱা চাউলমুঠিয়ে   সেই দুৰ্ভগীয়া পৰিয়ালটো  চলি আছে  ৷ কিশোৰ গৰাকীৰ চকুহাল চলচলীয়া ৷  কিশোৰ গৰাকীৰ চকুহালে পোৱা , নোপোৱা  , আশা নিৰাশা  তথা অবুজ বেদনাৰ  বহু কথাই বুজাই দিয়ে৷  কিবা এটা দিব , সহায় কৰিব নেকি কোনোবাই ,  এনে এটা আশাত  বন্দী কিশোৰ  গৰাকী ৷ পেটৰ ভাতমুঠিৰ তাড়নাত   কনমানিটোৱে  অহৰহ  কঢ়িয়াই লৈ ফুৰে   এটি  জোলোঙা   ৷   সংসাৰৰ  বেদনা কনমানিটোৱে অহৰহ বহন কৰিব লগা হৈছে   ৷ সহায়ৰ বাবে হাহাকাৰ কৰি ফুৰিব লগা হৈছে  কনমানিটোৱে ৷ তেওঁৰ  যেন এটাই চিন্তা পিতৃক কোনো মতে চকুৰ চিকিৎসা কৰাৰ ৷  বিভিন্ন জনৰ ওচৰত সহায়ৰ বাবে  হাত  বিচাৰিয়ো যেন   থমকি ৰৱ লগা হৈছে ৷  এনে এক কঠিন পৰিস্থিতিৰ মাজত মোকাবিলা কৰিবলগা হৈছে  বিশ্বনাথ জিলা ছেলাইখাতি গাওঁ পঞ্চায়তৰ অন্তৰ্গত মহজুলি বস্তি গাওঁৰ চুমনজ্যোতি গড়  নামৰ ৯ বছৰীয়া কিশোৰে  ৷   হাঁহি যেন তেওঁৰ  মুখৰ পৰা হেৰাইছে ৷ কিশোৰ মনৰ হাজাৰ সপোন থানবান   হৈ পৰিছে  ৷   কঠিন বাস্তৱৰ  হাবুডুবু খোৱা কোমল মনৰ  জীৱন গাথা চুমনজ্যোতি গড়ৰ   ৷ দাৰিদ্ৰতাৰ বোজা এতিয়াৰে পৰা লবলগা হৈছে কনমানিটোৱে    ৷  পিতৃৰ  নাম বীৰবল গড় ৷  আজিৰ পৰা প্ৰায় ৬ মাহ মানৰ পুৰ্বে মহালক্ষী চাহ বাগিছাৰ ফেক্টৰীত কাম কৰি বীৰবলে  পৰিয়ালটিক পোহপাল দি    আছিল   ৷ দুভাগ্যবশত কাম কৰি থকা অৱস্থাতে উচ্চৰক্ত চাপ জনিত ৰোগত আক্ৰান্ত হব লগা হৈছিল  তেওঁ ৷ যাৰ ফলত  তেওঁৰ   চকুহাল    বিকল  হৈ পৰে     ৷  সম্পূৰ্ণ অন্ধ  হৈ পৰিল  বীৰবল গড় নামৰ লোকজন ৷  বিশ্বনাথ চাৰিআলিৰ চকু চিকিৎসালয় দেখুৱাই যদিও ফল নধৰিল ৷ হয়তো প্ৰয়োজন হব উন্নত চিকিৎসাৰ ৷ হাতত নাই ফুটা কড়ি ৷ পেটৰ ভাতমুঠিৰ বাবে হাহাকাৰ কৰিবলগা অৱস্থা ৷ এনে স্থলত চিকিৎসা কৰে কেনেকৈ ৷ ইফালে দুৰ্ভগীয়া বীৰবল গড়ৰ  পত্নীও  আছে ৷   এটি   ১১মাহৰ  ফুল কুমলীয়া  শিশুৰ সৈতে ভাগ্যকে ধিয়াই কোনোমতে  জীৱন ধাৰন  কৰিবলগা হৈছে তেওঁৰ পত্নী  ৷  কনমানি শিশুটিৰ বাবে কামবন কৰিব পৰা  নাই বীৰবল গড়ৰ পত্নী   ৷ উল্লেখ্য যে     যি সময়ত লগৰ সমনীয়াই সাজিকাচি বিদ্যালয়লৈ পঢ়িব যায় , সেই সময়তে  চুমনজ্যোতিয়ে   পিঠিত ফটাছিটা জোলোঙা লৈ  পিতৃৰ সৈতে  ভীক্ষা কৰিব  ওলাই যায় ৷   হাইৰে মানৱতা ৷ যাৰ  নাই কোনো  তাৰ হয়তো ভগবানেও নহয়  সদয়   ৷ এনে এক বিষম পৰিস্থিতিৰ মাজত যুজ দি আছে কনমানিগৰাকী ৷ শিক্ষাৰ পৰা বঞ্চিত কিশোৰ গৰাকী ৷  চৰকাৰী সা-সুবিধা বুলিবলৈ নাই ৷ সেয়েহে    পৰিয়ালটিৰ প্ৰতি ৰাইজে সদয় হওঁক ৷  দুৰ্ভগীয়া বীৰবলৰ  চকু চিকিৎসাৰ বাবে  বিশ্বনাথ  সমষ্টিৰ  বিধায়ক  প্ৰমোদ বৰঠাকুৰৰ  লগতে  জনপ্ৰিয় মুখ্যমন্ত্ৰী গৰাকীয়ে   কিছু হলেও সুব্যৱস্থা কৰক ৷   কিশোৰ মনৰ কণমানিটো কিমান দিনলৈ চলাব  এই জীৱন সংগ্ৰাম ৷ কোনোৱাই হাতত ধৰি কণমানিটোৰ জীৱনটো  সজাই তুলিবনে ?  সেয়েহে দল সংগঠন , অনুষ্ঠান-প্ৰতিষ্ঠানৰ লগতে চৰকাৰী বিভাগে এই পৰিয়ালটিৰ প্ৰতি সহায়ক হওঁক এয়াই কনমানি গৰাকীৰ আকুল আহ্বান ৷